Sheekh Mukhtaar Roobow (Abuu-mansuur) oo kamid ah Golaha Maxaakimta ayaa markii ugu horeysay beeniyay in ay madaafiic ku garaaceen Suuqa oo ay dowladda Federaalka ku eedeysay.
Abuu-mansuur oo wareysi siiyay Mid kamid ah Idaacadaha Muqdisho ayaa sidoo kale waxa uu sheegay in Dowladda ay mar waliba la ogyahay in wixii ay sameeyaan ay ku eedeeyaan iyaga lakin waxa uu si toos ah u qiray in Madaafiicdooda ay ku garaacaan oo keliya Goobaha ay kusugan yihiin Ciidamada Itoobiyaanka.
“anaga marnaba kuma garaacno goobaha rayidka Madaafiic, Madaafiicdeenu waxa ay si toos ah ugu jeedaan goobaha ay cadowga kusugan yihiin oo ah Itoobiyaanka iyo daba dhilifkooda” ayuu yiri Abuu-masnuur.
Ugu dambeyntii Abuu Masnuur waxa uu si toos ah u sheegay in uu kusugan yahay Gobolka Bay isla markaana uu ka hayo halkaasi wixii horey uu Muqdisho ugu hayay oo ah halgankii dalka lagu xoreyn lahaa isaga oo intaasi ku daray in dhaq dhaqaaq xoogan ay ka wadaan maalmahani dambe magaalada Baydhabo.
Waa markii ugu horeysay oo Abuu-mansuur uu si toos ah u qirto in uu kusugan yahay magaalada Baydhabo isla markaana halkaasi uu ka wado hawlgallo ballaaran iyo dagaalo ay kula jiraan maleeshiyada dowladda iyo kuwa Itoobiyaanka ee isbaheysanaya.
(Posted by CABDALLA HABIIB, December 18, 2007, 6:27 AM)