"Ma ahan suuro gal marnaba in aan la shaqeyno ciidamada Itoobiya, Hadana lama shaqeyno" sidaasi waxaa yiri Afhayeenka cusub ee Ciidamada Amisom ee ku sugan magaalada Muqdisho oo caawa Wareysi bixiyay.
Afhayeenka, Captain Barige oo goor dhoweyd wareysi siiyay Idaacada Banadir ee magaalada Muqdisho uu sheegay in ciidamada Amisom howshooda ay tahay in ay ka shaqeeyaan sidii ay u ilaalin lahaayeen amaanka goobaha dowlada.
"aniga waxaa uun nagala doonayaa in aan difaacno goobaha aan ku sugan nahay, isla markaasna aan is difaacno haddii nala soo weeraro, kama qeyb qaadaneyno weerarada dhacaya, haddii dabcan nala soo weeraro, waa qasab in aan is difaacno" ayuu yiri Afhayeenka.
Wuxuu sheegay in ay doonayaan in ay dadka Soomaaliyeed nabad helaan, isla markaana ay ka fogaanayaan wax kasta oo qalalaase abuuraya, waa sida uu hadalka u dhigaye.
Wuxuu sheegay in ay jiraan ciidamo ka imaanaya wadamo badan oo Afrikaan ah oo ka qeyb qaadanaya howlaha nabad ilaalinta, sida oo caalamka ka codsadey in ay gacan ka geystaan sidii ay Somalia u imaan lahaayeen.