MOGADISHU (Boondheere.com) - Ra'iisal wasaaraha Xukuumadda KMG Somalia Prof. Cali Maxamed Geedi, ayaa daboolka ka qaaday in Dowladdiisa ay diyaar u tahay wax ka qabashada cabashooyinkii ay u soo jeediyeen Odayaasha Beelaha Hawiye.
Prof. Geedi ayaa si weyn carabka ugu adkeeyey in dhammaan cabashooyinkaasi wax laga qaban doono, isla markaana dhusha u ridaneyso Xukuumadiisa, sida uu ballanqaaday.
R/wasaaraha ayaa intaa ku daray in dhibaatooyinka ay geestaan ciidamada sidoo kale wax laga qaban doono, isla markaana lagula xisaabtami doono, isagoona shacabka uga tacsiyeeyay dhibaatooyina ay ciidamadu u geesteen waayadii ugu dambaysay.
Geedi ayaa hadalkan ka sheegay, kadib kulan shalay uu la qaatay Odayaasha dhaqanka iyo midnimada Beelaha Hawiye, kaasoo noqonayo kii ugu horeeyay oo ay si wada jir ah isugu yimaadaan garabyada Siyaasadda Beelaha Hawiye ee markii hore labada garab u kala jabay, balse haatan uu Geedi ku guulaysay inku keenistooda, sida muuqata, si uu taageero uga helo Beelaha Hawiye oo uu isaga heyb ahaan ka dhashay.
