Qaar ka mid ah Dadkii ku dhaawacmay dagaaladii xanuunka badnaa ee dhawaan ka dhacay caasimadda oo shalay laga duuliyey Garoonka Muqdisho ayaa haatan lagu daweynahaa wadanka Jabuuti.
Dhaawacyada loo qaaday Dibadda oo gaaraya ilaa 17-qof ayaa dhaawacoodu uu yahay mid halis ah waxaana ku jira Caruur aad u yar yar oo dhaawacooda wax looga qaban waayey Isbitaalada Muqdisho.
Dowladda Jabuuti ayaa deeq caafimaad u fidisay bukaanada ugu daran ee la irdaran dhaawacyada dagaaladii lagu hoobtay ee bishii tagtay hareeyey Caasimadda.
Afhayeen u hadlay Dowladda Jabuuti ayaa ku waramay in Wasiirka Caafimaadka Jabuuti Cabdalla C/llaahi uu dadkaasi dhaawaca ah si diiran ugu soo dhaweeyay Garoonka Diyaaradaha Jabuuti isagoo dadkii dhaawaca ahaa u kala qeybiyay Isbitaalada waa weyn ee dalkaasi.
